جانور کا دودھ بڑھانے اور بو ختم کرنے کا ٹوٹکہ

محترم حضرت حکیم صاحب السلام علیکم! عبقری رسالہ بہت شوق سے پڑھتا ہوں‘ اللہ کریم سے دعا ہے کہ اللہ آپ کو خیر کاکام اسی طرح چلانے کی توفیق دے اور اس میں مزید برکت عطا فرمائے۔ میرا تعلق زمیندار گھرانے سے ہے اور ہم نے دودھ کیلئے گائیں اور بھینسیں رکھی ہوئی ہیں‘ گھر میں بھی استعمال ہوتا اور باقی بیچ دیا جاتا ہے۔ الحمدللہ! عبقری میں دئیے مسنون اعمال کو اپنانے کی بدولت اللہ کریم نے بہت کرم فرمایا ہوا ہے اور ویسے بھی دودھ کے کام میں برکت بہت ہے‘اللہ تعالیٰ عبقری کو دن دگنی رات چگنی ترقی عطا فرمائے۔ عبقری میں اکثر اپنے کسان بھائیوں کے آزمودہ طبی و روحانی تجربات پڑھتا ہوں بہت مستفید ہوتا ہوں بلکہ جب بھی عبقری رسالہ آتا ہے تو میں سب سے پہلے ’’کسان دوست عبقری‘‘ سلسلہ پڑھتاہوں ۔میرے پاس بھی ایک ٹوٹکہ ہے جو میں عبقری قارئین کی نذر کرنا چاہتا ہوں یقیناً دودھ بیچنے والے حضرات اور جنہوں نے گھر کے دودھ کیلئے بھی جانور رکھے ہوئے ہیں ان کو اس ٹوٹکہ سے بہت فائدہ ہوگا۔ بھینس دودھ بھی زیادہ دے گی اور دودھ سے جو سمیل آتی ہے وہ بھی ختم ہوجائے گی۔ اس کے علاوہ اکثر گائے یا بھینس کےاندر چھچھڑی پیدا ہوجاتی ہے یا دودھ میں خون آتا ہے یا اکثر جانوروں کو بادی ہو جاتی ہے۔ ان سب کے لیے یہ ٹوٹکہ انتہائی کمال کا ہے‘ بے شمار مرتبہ کا آزمودہ ہے۔صرف ہفتہ یا دس دن جانورو ں کو ایک مٹھی بھر کر کھلانی ہے‘ نسخہ حسب ذیل یہ ہے: سونٹھ ایک چھٹانک، سونف ایک چھٹانک، کالا نمک ایک چھٹانک، سفید نمک ایک چھٹانک، اجوائن دیسی ایک چھٹانک، سفید زیرہ ایک چھٹانک، کالی مرچ ایک چھٹانک، گڑ ایک کلو، ڈنڈا نشادر ایک چھٹانک ۔ ان سب چیزوں کو کوٹ کر لڈو بنا لیں اور جانوروں کو ایک لڈو صبح یا شام کھلائیں۔ دودھ بھی بڑھ جائے گا اورامراض بھی ٹھیک ہو جائےگا۔ (رائو محمد صادق، ہارون آباد)
جانور کو صحت و تندرستی دلانے کا ٹوٹکہ
محترم حضرت حکیم صاحب السلام علیکم! عبقری رسالہ پورا گھرانہ بڑے شوق سے پڑھتا ہے۔ میں نےگھر میں تین بکریاں پال رکھی ہیں‘یہ میرا کوئی کاروباری سلسلہ نہیں صرف شوق ہے‘ الحمدللہ! اللہ نے جگہ دے رکھی ہے اور ان کے چارہ کا بھی بندوبست ہے اس لیے مجھے زیادہ پریشانی نہیں ہوتی‘ ایک مرتبہ اس طرح ہوا کہ گھر میں مہمان آئے ہوئے تھے میں کام کے سلسلے میں شہر سے باہر تھا۔ بچوں نے ایک بکری کو بہت زیادہ کھلا دی اس کا پیٹ پھول گیا‘ مجھے والدہ کا رات کو
فون آیا کہ بکری کی طبیعت ٹھیک نہیں لگ رہی‘ اس کا پیٹ پھولا ہوا ہے ۔ جب میں نے وجہ پوچھی تو میری والدہ نے تمام صورتحال مجھے بتائی‘ مجھے فوراً عبقری 2014ء کے جنوری کے شمارہ میں آیاٹوٹکہ یا د آیا جو کہ کسی قاری نے لکھا تھا۔ میں نے فوراً والدہ کو کہا کہ اسے پانی ہرگز نہ پلائیں اور گھر میں اگر دیسی گھی موجود ہے تو بہت بہتر اگر نہیں تو جو بھی گھی گھر میں ہے اس کو گُڑ پر لگا کر بکری کو ایک لڈو کے برابر کھلا دیں‘ میری والدہ نے ایسا ہی کیا‘ میں صبح تک پریشان رہا‘ صبح میری والدہ نے کہا کہ بکری کے پاس کھڑی ہوں بکری چارہ کھارہی ہے اور پیٹ بھی ٹھیک ہے۔